MOLLYWOOD

UPTOWN энэ удаад шинэ үеийн залуу жүжигчдийн төлөөлөл гарсныг  уншигчид маань анзаарсан байх. Сүүлийн үеийн тайз, дэлгэцийн бүтээлүүдэд гол дүр бүтээж буй эдгээр жүжигчид монголын кино урлагийн ертөнцөд өөр өөрийн өнгөө нэмж байгаатай хэн ч маргахгүй биз. Тэгээд ч өдгөө дэлгэцнээ гарч үзэгчдийн хүртээл болж байгаа кинонууд болоод, тэдгээрийг бүтээгч уран бүтээлч, студи, продакшнууд ирээдүйн “Молливуд”-ын эхлэл ч байж болох юм. Энэ ч үүднээс бид уншигч та бүхэнд “Молливуд” хэмээн онцлон танилцуулж байна.

“Боолын гэрээ”

Найруулагч- З.Батболд
Продюссер- Д.Хүрэлхүү
Гол дүр:
Булгаагийн дүрд-Т.Отгонцэцэг

“Хувьсал” продакшн нэгэн үе дуулиан тарьсан жүжгүүдээсээ гадна сайхан бүсгүйчүүдээрээ алдартай байлаа. Эдгээр бүсгүйчүүдийг нь тойрсон дуулиан шуугиан ч тасардаггүй байв. Тэдний нэг нь жүжигчин Т.Отгонцэцэг. Нэгэн цагт “Монголын сайхан бүсгүй” тэмцээний мөнгөн эрдэнийн титмийг хүртэж явсан гоо бүсгүй маань өдгөө шинэ үеийн чадварлаг жүжигчдийн тэргүүнд алхаж явна.  “Хувьсал” продакшнд байхдаа “Чамайгаа алдмааргүй байна”, “Зургаан сар минь баяртай”, “Миний хайрыг хүлээ”, “Дурлахыг хориглоно” зэрэг арваад дүр бүтээхдээ ихэвчлэн жүжигчин хүнээс хамгийн их ур чадвар шаарддаг эсрэг дүрүүдийг бүтээдэг байсан нь түүнийг ямар чансаатай жүжигчин бэ гэдгийн нь нэг илрэл биз. Гэвч “Боолын гэрээ” кинонд анх удаа эерэг дүр бүтээсэн нь “Улаанбаатар-III” кино наадмын шилдэг эмэгтэй дүрийн шагналыг түүнд авчирсан юм. Үүний дараа “Орхидос” кинонд мөн л эсрэг дүр болох хойд эхийн дүр бүтээсэн нь үзэгчдийн сэтгэлд хүрчээ. Одоо тэрбээр УДЭТ-ын жүжигчин. Түүнийг тайз, дэлгэцийн олон сайхан дүр бүтээх ирээдүй хүлээж буй нь дамжиггүй.

“Миний хөрш чөтгөр”

Найруулагч- И.Одончимэг
Гол дүрүүд:
Оргилийн дүрд- Т.Бархүү
Сайханзаяагийн дүрд- Г.Нарансолонго

Хошин урлагийн “Х түц” хамтлагийнхан сүүлийн үед инээдмийн киноны төрөл болон сонгодог жүжгийн төрөлд хүч үзэх болсон. Харин эдгээрийн гол дүрүүдийг тус хамтлагийн залуу жүжигчид түлхүү бүтээж байгаа нь нууц биш юм. Энэ ч утгаараа сүүлийн үед гарсан кинонууд дундаас инээдмийн кино гэдгээрээ ялгаран нэлээд эрэлттэй байсан “Миний хөрш чөтгөр” кино, Хятадын алдарт зохиолч Цао Юүгийн “Аянгын бороо” жүжгийн гол дүрүүдийг тус хамтлагийн жүжигчин Т.Бархүү, Г.Нарансолонго нар бүтээсэн билээ. Г.Нарансолонгын хувьд монголын анхны олон ангит кино болох “Мөрөөдлийн хөлөг онгоц”, уран сайхны “Зүүд шиг хайр”,  “Харьд одсон бүсгүйн заяа” зэрэг кинонд гол дүр бүтээсэн туршлагатай жүжигчдийн нэг бол Т.Бархүүгийн хувьд “Сэргээш”-д жүжигчин Одноод дурласан Горилла хочит хүүгийн дүрээр олонд анх танигдсан. Мөн UBS телевизийн нэвтрүүлэгч Оюунцэцэгтэй хамтран “Домог” киноны дууг дуулсан нь олонд түгсэн. Тэр ч утгаараа сүүлийн үед рекламд их тоглож байгаа эрэлттэй жүжигчдийн нэг юм. Тэгээд ч зогсохгүй бодит амьдрал дээр ч “алаг нүдэн” И.Одончимэг, Т.Бархүү хоёрын дурлал олны чихийг дэлдийлгэх болсон билээ.

“Төрийн дайсан”

Найруулагч- П.Дэлгэрбаяр
Гол дүрүүд:
Мөнхтөрийн дүрд- М.Мягмар
Хангалын дүрд- Д.Лхагва
Туслах дүр:
Солонгын дүрд- Н.Цэнд-Аюуш

“Төрийн дайсан” бол  “Гайз”-ын залуучуудын тоглосон гурав дахь кино. СУИС-ийн кино драмын анги төгссөн залуучууд нийлэн “Гайз-666” гэх хамтлаг байгуулсан нь залуусыг нэг хэсэгтээ л байлдан дагуулж чадсан. Уран бүтээлийнхээ оргилд үед “Зун орсон цас” музыкл Дуурь бүжгийн театрын тайзнаа тавьсан нь тэднийг сайн дуучид төдийгүй чамгүй сайн жүжигчид гэдгийг нь фэнүүдэд нь баталж өгсөн гэхэд болно. Түүгээр ч зогсохгүй тус хамтлагийн дуучин Д.Лхагва “Бидний найзын дурлал” уран сайхны кино, “Дурлал яг үлгэр шиг, бас үхэл шиг” жүжигт тоглож, хамтлагаараа “Сайн уу, амьдрал минь” кинонд тоглож, М.Мягмар гол дүрийг бүтээсэн нь үзэгчдээс өндөр үнэлэлт аваад байгаа билээ. Энэ бүгд “Монгол кино нэгтгэл”-ийн залуу уран бүтээлчидтай хамтран бүтээж байгаа “Төрийн дайсан” киноны гол дүрүүдэд М.Мягмар, Д.Лхагва нарыг урихад том нөлөө болсон нь мэдээж. Харин жүжигчин Н.Цэнд-Аюушийн хувьд “TV коктейль” хамтлагийн жүжигчин гэдгээрээ олонд танигдах болсон. Тэрбээр “Диваажинд хүрэх зам”, “Бага нас минь баяртай” зэрэг жүжгүүд, “TV коктейль” хамтлагаас гарсан DVD-нүүдэд тоглож байсан ч “Сайн уу, амьдрал минь” киноны гол дүр болох Тунгаагийн дүр нь түүний дэлгэцийн бүтээлд бүтээсэн анхны томоохон дүр юм.

 “Гоёлын даашинз”

Найруулагч- З.Батболд
Продюссер- Д.Хүрэлхүү
Гол дүр:
Ариунаагийн дүрд- Д.Пүрэвсүрэн

Шинэ үеийн чадварлаг жүжигчдийн тоонд өдгөө Д.Пүрэвсүрэнг нэрлэх болжээ.
Түүний хувьд сурагчийн ширээнээс салж амжаагүй жаахан охин насны зөрүүтэй баян эртэй амьдралаа холбосон нь дэндүү эрт бусдын нүд, үг хэлэнд олзлогдох шалтгаан болсон гэхэд болно. Гэвч тэрээр тун удалгүй бусдын нөөлөгт амьдрах хүн биш гэдгээ харуулж загварын тайзнаа гялалзаж, топ модель гэх алдрыг төвөггүйхэн хүртсэн. Харин СУИС-ийн кино драмын ангийг төгссөн нь жүжигчин гэх шинэ алдрыг түүнд авчирсан билээ. Залуу жүжигчний хувьд “Хувьсал” продакшнд ажиллаж, “Чамайгаа алдмааргүй байна”, “Зургаан сар минь баяртай”, “Миний хайрыг хүлээ” зэрэг хэд хэдэн жүжигт тоглосон нь чамлахааргүй амжилт байлаа. Тэгвэл “Гоёлын даашинз” киноны Ариунаагийн дүр нь түүний дэлгэцнээ бүтээсэн анхны гол дүр юм. “Боолын гэрээ” кинонд туслах дүр бүтээсэн нь энэ дүрд тоглохын эхлэлийг ч тавьсан байж магадгүй.

“Лусын дагина” жүжиг

Найруулагч-Хишигзаяа
Гол дүр:
Лусын дагина- Т.Хулан

УДЭТ-ийн жүжигчин Т.Хулан гэхээр үзэгчдийн сэтгэлд “Сарны нулимс” киноны Цоомоогийн дүр буудаг. Хэдийгээр жүжигчин бүсгүй маань өмнө нь хошин урлагийн “Х түц” хамтлагт жүжигчнээр ажиллаж, “Чиний эзгүйд”, “Хайрыг хайрла”, “Нэгэн нарны дор” зэрэг дөрвөн ч киноны гол дүрийг бүтээсэн ч Цоомоогийн дүр түүнийг үзэгчдэд илүү ойр таниулж өгсөн. Үүний дараа тоглосон “Зөрлөг” кино ч чамгүй амжилт дагуулсан гэхэд болно. Гэсэн ч бид энэ удаа түүний УДЭТ-ийн тайзнаа бүтээсэн “Лусын дагина”-ийн дүрийг онцолж байна. Тэрбээр энэ дүрээрээ драмын урлагийн шилдгийн шилдгүүдийг шалгаруулдаг “Гэгээн муза” наадмаас хүүхдийн жүжгийн шилдэг эмэгтэй дүрийн шагналыг хүртсэн билээ. “Лусын дагина” түүний театрт ороод авсан анхны гол дүр төдийгүй, хүүхдийн жүжигт бүтээсэн анхны дүр нь юм. Ер нь тэр тоглосон кино, жүжиг бүртээ дандаа л гол дүр бүтээсэн байх аж. Энэ бүхэн залуухан жүжигчин бүсгүйг их юм дуулгах нэгэн гэдгийг хэлээд байх шиг. Одоо тэрбээр УДЭТ-ийн тайзнаа тавигдаж байгаа бүх л жүжигт оролцож, хэдийнэ завгүй жүжигчдийн тоонд багтжээ.

Гоёлын даашинз”

Найруулагч- З.Батболд
Продюссер- Д.Хүрэлхүү
Гол дүр:
Чукагийн дүрд- Б.Одбаяр

“Хувьсал” продакшнаар нэг хэсэг овоглож, “А Саpella” хамтлагаараа олонд танигдсан жүжигчин залуус тус тусын уран бүтээлдээ анхаарах болсоор багагүй хугацааг үдээд байна. Тэдний нэг нь жүжигчин Б.Одбаяр. Тайзнаа “Чамайгаа алдмааргүй байна”, “Зургаан сар минь баяртай”, “Нэг л уучилья” зэрэг хэд хэдэн жүжигт тоглож, залуу үеийнхэн дотроо чадварлаг жүжигчинд тооцогдох болсон тэрбээр анх удаа дэлгэцнээ гол дүр бүтээсэн нь “Гоёлын даашинз” киноны гол дүр юм. Уг кинонд ангийн анд, жүжигчин Д.Пүрэвсүрэнтэй хамтран тоглосон нь хэзээнээсээ л тэр хоёрыг холбож бичих дуртай хэвлэлүүдийн хоббиг сэргээсэн гэхэд болно. Хоёр жүжигчин маань энэ бүхний хариуд “бид зөвхөн сайн найзууд” гэсэн ганцхан хариултыг л өгөөд байгаа. Түүнчлэн Б.Одбаярын хувьд “Гоёлын даашинз”-ын найруулагч З.Батболдтой оюутан байхаасаа л хамтарч ажилладаг байсан гар нийлсэн хамтрагчид юм. Энэ дүр түүний дэлгэцнээ бүтээсэн анхны гол дүр болохоос анхны дүр биш. Учир нь тэрбээр өмнө нь хоёр,гурван кинонд туслах дүр бүтээж амжсан юм.