ГУРВАН сэтгэл НЭГ хүсэл

Шүүслэг, исгэлэн, гижиг хүрэм, хамтлаг. Эдгээр тодорхойлолтууд чухам киви жимсэнд, “Киви”-гийнхэнд өмчлөгдөх биз. Монголын эстрад урлагийн хамгийн зарчимч, хатуу хатагтай гэгддэг продюссер Ангирмаа хамтлагтаа нэр өгөхдөө чухам энэ талаар бодож амжсан байж таарна. Тэр бол энэ зэргийн юмыг хүртэл орхигдуулах нэгэн биш билээ.
Рок, поп урлагт 2000-аад оноос хойш өнгөний цуглуулга-стильный гурван охин гарч ирж, өнгөрсөн бүх цаг хугацаан дахь охидын хамгийн хүчирхэг группийг бий болгож чадсан нь энэ урлагт бас нэгэн шинэ содон үзэгдэл болж үлдсэн юм. Тэгэхээс ч өөр аргагүй. Арьсны өнгө, гадаад үзэмж, биеэ авч яваа байдал, орчин үеийн хэмнэлд нийцсэн дуу, бүжиг, өөр өөрийн ялгарах онцлог гээд Ука, Намуунаа, Агий гурав гурван өөр ертөнц, нэг сэтгэл юм. “Киви”-чүүд Nature sound-аас үүсэлтэй. Хамтлагийн ахлагч Ука үсчин, гоо засалч мэргэжилтэй. Түүнийг Nature sound-д дуулаачийн курст суралцаж байхад багш нь олж харан, улмаар Ухнаа гуайн ач, өвөрмөц охинтой нийлүүлж бас нэг Ази царайтай охиныг нэмбэл цоо шинэ дүр төрх, имиж стиль гарч ирэхийг Ангирмаа хатагтай соргог олж харсанаар “Киви” “мэндэлсэн” юм. Охидын уран бүтээлээс авахуулаад стиль имиж, бодлого бүгд Ангирмаа хатагтайнх. Хойно хөгжмийн сургууль төгсч ирсэн тэрээр 90-ээд оны эхэн үед дуулж, бас хөгжмийн ая зохиож эхэлсэн чадварлаг мэргэжилтэн. Харин одоо урлагт хийж гүйцээгээгүй, хийхийг хүсдэгээ, мэдрэмжээ, мэдлэгээ, вкусээ “Киви”-гээр дамжуулж илэрхийлдэгээ нэгэнтээ ам алдсан нь бий. Өнгөц дүгнэхэд хахир хатуу, эршүүд гэмээр Ангирмаа хатагтай дотооддоо асар их мэдрэмжтэй, хүүхэнлиг, хэмнэлтэй, өвөрмөц сэтгэлгээтэй болохыг эндээс төвөггүй харж болно. Тэр үнэндээ хатуу, зарчимч багш. Продюссер ийм байхаас ч өөр аргагүй биз. Охидын амжилтын нууц чухам энд оршдог. Урлаг гэгч тийм ч амар дэвжээ биш. Тэнд хатуу, тууштай байж амжилтанд хүрдэг дүрмийг тэр сайн мэднэ. Хамтлаг үндсэн гурван дүрэмтэй. Нэгдүгээрт, урлагийн тогооноосоо дотно харилцаатай болохгүй байх. Хоёрдугаарт, ёс зүйг эрхэмлэх. Урлагийнхан уяхан сэтгэлтэй, сулхан өвөртэй гэх шүүмжлэлийн эсрэг, завхайрал, зүй бус явдлаас хол эрхэм ёс зүйтэй байх нь мэдээж чухал. Гуравдугаарт, урлагийн карьер хөөж байх үедээ гэр бүлтэй тодруулбал, хүүхэдтэй болж болохгүй. Сонсоход хэтэрхий хатуу гэмээр эдгээр дүрэм тэдний амжилтанд нөлөөлсөөр ирсэнийг бид бэлхнээ мэдэх. Чухам эдгээр дүрмийг зөрчсөнөөс болж Ази царайтай олон охид “Киви”-гийн данснаас хасагдаж, тэр бүр дуулиан шуугиан дэгдээж байсныг бид бас мартаагүй байгаа.

Хамтлагийн ахлагчинйхаа хувиар ч тэр, хувь хүнийхээ мөн чанараар ч тэр “Киви”-гийн хамгийн тод дүр Ука. Жинхэнэ боловсорсон жимс. Гадна харагдах байдлаасаа огт өөр дотоод ертөнц бол Укагийнх. Хүн өөрийн хүчээр амьдралаа бий болгож, зорилгынхоо төлөө тууштай, шаргуу хөдөлмөрлөх ёстой гэж тэр үздэг. Хамтлагийн хамгийн үнэнч гишүүн тэр их эрч хүчтэй, санаачлагатай, гоо сайхны өндөр мэдрэмжтэй байдаг нь Киви хамтлагийн дүр төрхөд онцгой нөлөөлдөг санагдсанаа нуух юун. Үсчин, гоо сайханч мэргэжилтэй тэрээр өөрөө үсээ янзалж, makeup-аа хийдэг. Найз залуутайгаа зургаан жил үерхэж байгаа тэр хөнгөмсөг сээтэгнүүр дүр төрхтэй харагддагаасаа огт өөр зүрх сэтгэлийн хандлагатай.

Жинхэнэ нэр нь Алтанцэцэг. Гэвч хамтлагийнхан нь Агий хэмээн дууддаг. Ер нь “Киви”-гийн хамгийн адармаатай, тогтворгүй байр суурь бол яагаад ч юм энэ Ази охидынх. Хамтлагийн хатуу дүрмүүдээс зөрчиж тэр тоолонд дуулиан дэгдээж гишүүнээ сольдог нь зуршил болсон ч гэмээр. Агий гэхэд л дөрөв дэхь гишүүн. Дөнгөж хорь шүргэж яваа Агий хамтлагт ороод удаагүй. Тиймдээ ч гоо үзэсгэлэн, авьяас, өөрийн орон зайгаа тийм ч тод томруун гаргаж чаддаггүй хэмээх шүүмжлэлийг бусдаас авдаг. Ёстой л боловсорч яваа жимс. Түүнээс сайхан бүсгүй, сайн дуучин болох ирээдүй харагддаг.

Хамтлагийн бас нэгэн тод дүр төрх Намуунаа. Өөрийн гэсэн өнгө, орон зайг тэр “Киви”-д эзэлдэг. Монголын урлагийн ахмад, тодруулбал, алтан үеийн партизан Ухнаа гуайн ач охин тэрээр мөн л хамтлагийн хамгийн тогтвортой, үнэнч гишүүн. Өвөөгөө дагаж хар багаасаа урлагт хайртай болсон түүний явах зам мөр угаасаа л тодорхой байсан гэдэг. Хөгжим бүжгийн коллежийг дүүргэсэн Намуунаа боловсорч гүйцэж буй жимс. Эмэгтэй хүний хувьд, тэр дундаа урлагийн эмэгтэйн хувьд тэр өөрийн имиж, өнгө төрхөө олж амжсан. Хүүхдэрхүү ааш нь өвөөгийн эрх охины араншин гэмээр.

Ийм л гурван өөр өнгө төрх, гурван өөр дотоод сэтгэл, ааш араншинтай, нэг сэтгэл, тэмүүлэлтэй “Киви”-чүүд Монголын эстрад урлагийн түүхэнд өөрийн гэсэн түүхээ бичиж явна. Бид ч тэднийг энэ удаад өөр өнгө, урьд өмнө гарч байгаагүй шийдлээр гаргаж ирэхийг зорьсон маань энэ. Тэд энэ сарын 15-наас хөдөө орон нутгийн үзэгчиддээ “Чамд амжилт хүсье” тоглолтоо өргөн барих гэж байгаа.
Ангирмаа хатагтайн шаргуу хөдөлмөрч, хойш суухыг тэвчиж чаддаггүй зан, өөр мэдрэмж, авьяасын үр болсон исгэлэн жимснүүдэд уншигчдынхаа өмнөөс амжилт хүсье.